Opsomming
Die voorstelling en beelde wat die mens van sy medemense, vreemde groepe, ander nasies en state vorm, word aangeleer. In die huidige tyd vorm die massakommunikasiemedia en die berigte oor ander state wat daarin verskyn, van die belangrikste bronne vir die aanleer en ontstaan van sulke voorstellings. Deur gedurige herhaling ontwikkel hulle dan tot stereotipe voorstellings. Daar beslissingsnemers in die internasionale sfeer ook onder die verbruikers van die massamedia tel gee dit aan hierdie probleem ‘n interessante politieke dimensie. Die stereotipe beeld van Suid‐Afrika in die buiteland word dus o.a. veroorsaak deur die beskrywing op ‘n bepaalde wyse, en die herhalende gebruik van sekere woorde, frases, slagspreuke en uit‐drukkingswyses wanneer daar na gebeure en ontwikkelinge in Suid‐Afrika verwys word in die massamedia van ‘n bepaalde land.